ശ്രേയസ് അയ്യര്‍-സൂര്യകുമാര്‍ യാദവ്: താരതമ്യത്തിന് സ്ഥാനമില്ലെന്ന് മുന്‍ ഇന്ത്യന്‍ താരം

ന്യൂസീലന്‍ഡിനെതിരായ ആദ്യ ടി20 മത്സരത്തിന് മുന്നോടിയായി, നായകന്‍ ശ്രേയസ് അയ്യറും മുന്‍ ക്യാപ്റ്റനും ടി20 ലോകകപ്പ് വിജയിപ്പിച്ച നായകനുമായ സൂര്യകുമാര്‍ യാദവും തമ്മിലുള്ള താരതമ്യങ്ങളെക്കുറിച്ച് പ്രതികരിച്ച് മുന്‍ ഇന്ത്യന്‍ താരവും മുന്‍ സഹപരിശീലകനുമായ അഭിഷേക് നായര്‍. അയ്യര്‍ തന്റെ കരിയറില്‍ ഇതിനകം തന്നെ വിദേശത്ത് ധാരാളം മത്സരങ്ങള്‍ നയിച്ചിട്ടുണ്ടെന്നും അതിനാല്‍ ഈ താരതമ്യം അര്‍ത്ഥശൂന്യമാണെന്നും അദ്ദേഹം പറഞ്ഞു. ന്യൂസീലന്‍ഡില്‍ പരമ്പര ജയിക്കുന്നത് ശ്രേയസിന് ചുറ്റുമുള്ള എല്ലാവരുടെയും ആദരം നേടിയെടുക്കാന്‍ സഹായിക്കുമെന്നും അദ്ദേഹം കൂട്ടിച്ചേര്‍ത്തു.

വ്യാഴാഴ്ച മുതല്‍ ആരംഭിക്കുന്ന അഞ്ച് മത്സരങ്ങളുടെ ടി20 പരമ്പരയോടെ ഇന്ത്യ ന്യൂസീലന്‍ഡ് പര്യടനത്തിന് തുടക്കമിടുകയാണ്. ടി20 നായകസ്ഥാനം ഏറ്റെടുത്ത ശേഷമുള്ള തന്റെ ആദ്യ വിദേശ പര്യടനങ്ങളായ അയര്‍ലന്‍ഡിലും ഇംഗ്ലണ്ടിലും തോല്‍വി വഴങ്ങേണ്ടി വന്ന ശ്രേയസിന് ഈ പരമ്പര വളരെ നിര്‍ണ്ണായകമാണ്. സിംബാബ്വെയിലെ പരമ്പര ജയവും ജപ്പാനില്‍ നടന്ന ഏഷ്യന്‍ ഗെയിംസ് സ്വര്‍ണ്ണനേട്ടവും ഉണ്ടെങ്കിലും, വിദേശ മണ്ണില്‍ ഒരു ടി20 നായകന്‍ എന്ന നിലയില്‍ പ്രതീക്ഷിച്ച പ്രകടനം പുറത്തെടുക്കാന്‍ ശ്രേയസിന് ഇതുവരെ സാധിച്ചിട്ടില്ല.

സ്വന്തം തട്ടകത്തില്‍ നടന്ന ടി20 ലോകകപ്പിലേക്ക് നയിച്ച കാലയളവില്‍ സൂര്യകുമാര്‍ യാദവിന് കീഴില്‍ ഇന്ത്യ കൂടുതല്‍ മത്സരങ്ങളും കളിച്ചത് സ്വന്തം നാട്ടിലായിരുന്നുവെങ്കില്‍, ശ്രേയസ് അയ്യര്‍ക്ക് വിദേശരാജ്യങ്ങളില്‍ കൂടുതല്‍ മത്സരങ്ങള്‍ നയിക്കേണ്ടി വന്നു എന്ന് അദ്ദേഹം ചൂണ്ടിക്കാട്ടി.

'സൂര്യയുമായി താരതമ്യം ചെയ്യുമ്പോള്‍ അയ്യര്‍ അതിന് യോഗ്യനാണോ അല്ലയോ എന്നതല്ല വിഷയം. കാരണം, ആ സമയത്ത് ഇന്ത്യ തങ്ങളുടെ ഭൂരിഭാഗം മത്സരങ്ങളും കളിച്ചത് ഇന്ത്യയില്‍ തന്നെയാണ്. അവര്‍ അധികം യാത്ര ചെയ്തിരുന്നില്ല. എന്നാല്‍ ശ്രേയസ് അയ്യര്‍ ക്യാപ്റ്റന്‍സി ഏറ്റെടുത്ത ശേഷം ടീം ഇംഗ്ലണ്ടിലേക്ക് പോയി, ഇപ്പോള്‍ ന്യൂസിലാന്‍ഡിലേക്ക് പോകുന്നു. അതിനാല്‍ അദ്ദേഹത്തിന് കീഴില്‍ കളിച്ച ഭൂരിഭാഗം ടി20 മത്സരങ്ങളും ഇന്ത്യക്ക് പുറത്തായിരുന്നു-സിംബാബ്വെയിലും ജപ്പാനിലുമായിരുന്നു' -അഭിഷേക് നായര്‍ പറഞ്ഞു.

'ടി20 ലോകകപ്പിലേക്ക് നയിച്ച കാലയളവില്‍ നമ്മള്‍ എവേ മത്സരങ്ങളേക്കാള്‍ ഉപരി സ്വന്തം നാട്ടിലും ഉപഭൂഖണ്ഡത്തിലെ സാഹചര്യങ്ങളിലുമാണ് കൂടുതല്‍ കളിച്ചതെന്ന് ഞാന്‍ ഓര്‍ക്കുന്നു. അതിനാല്‍ ആ താരതമ്യം മാറ്റിവെക്കാം. നിങ്ങള്‍ ന്യൂസിലാന്‍ഡില്‍ പോയി വിദേശ സാഹചര്യങ്ങളില്‍ ജയിക്കുമ്പോള്‍, ആ ക്യാപ്റ്റന് ടീമില്‍ പൂര്‍ണ്ണ നിയന്ത്രണം അനുഭവപ്പെടുകയും ചുറ്റുമുള്ള എല്ലാവരുടെയും ആദരം ലഭിക്കുകയും ചെയ്യും. കാരണം അവിടെയാണ് നിങ്ങള്‍ ഏറ്റവും കൂടുതല്‍ വിലയിരുത്തപ്പെടുന്നത്. ഇംഗ്ലണ്ടില്‍ അത് സംഭവിച്ചില്ല, എന്നാല്‍ ന്യൂസിലാന്‍ഡില്‍ പോയി പരമ്പര ജയിക്കുകയാണെങ്കില്‍ അത് അദ്ദേഹത്തിന്റെ നെഞ്ചില്‍ ചാര്‍ത്തുന്ന ഒരു നക്ഷത്രം പോലെയായിരിക്കും. വ്യക്തിപരമായി 'എനിക്ക് വിദേശത്തും ക്യാപ്റ്റനായി ജയിക്കാന്‍ സാധിക്കും' എന്ന ആത്മവിശ്വാസം അത് നല്‍കും' -അദ്ദേഹം കൂട്ടിച്ചേര്‍ത്തു.

ടി20 നായകന്‍ എന്ന നിലയില്‍ 21 മത്സരങ്ങളില്‍ നിന്ന് 11 ജയവും 8 തോല്‍വിയുമാണ് അയ്യര്‍ക്കുള്ളത്. രണ്ട് മത്സരങ്ങള്‍ ഫലമില്ലാതെ അവസാനിച്ചു (വിജയശതമാനം 52%-ന് മുകളില്‍). ഈ തോല്‍വികളില്‍ ആറെണ്ണവും വിദേശ മണ്ണിലായിരുന്നു. ക്യാപ്റ്റന്‍ എന്ന നിലയില്‍ അയര്‍ലന്‍ഡ്, ഇംഗ്ലണ്ട് പര്യടനങ്ങളില്‍ പരാജയപ്പെട്ട അദ്ദേഹം വെസ്റ്റ് ഇന്‍ഡീസിനെതിരെ സ്വന്തം നാട്ടില്‍ സമനില വഴങ്ങി. എന്നാല്‍ ഏഷ്യന്‍ ഗെയിംസ് സ്വര്‍ണ്ണവും, സിംബാബ്വെ, അഫ്ഗാനിസ്ഥാന്‍ എന്നിവര്‍ക്കെതിരായ പരമ്പര ജയങ്ങളും അദ്ദേഹത്തിന്റെ അക്കൗണ്ടിലുണ്ട്. അതേസമയം, 52 മത്സരങ്ങളില്‍ നിന്ന് 40 ജയങ്ങളും 8 തോല്‍വികളും 2 ടൈകളും 2 ഫലമില്ലാത്ത മത്സരങ്ങളുമുള്ള സൂര്യകുമാര്‍ യാദവ്, 76.92 ജയശതമാനത്തോടെ ക്രിക്കറ്റ് ചരിത്രത്തിലെ തന്നെ ഏറ്റവും വിജയിച്ച ടി20 നായകന്മാരില്‍ ഒരാളാണ്.

ഇന്ത്യയുടെ ടി20 ടീംശ്രേയസ് അയ്യര്‍, അഭിഷേക് ശര്‍മ്മ, സഞ്ജു സാംസണ്‍, വൈഭവ് സൂര്യവംശി, ഇഷാന്‍ കിഷന്‍, തിലക് വര്‍മ്മ, അക്‌സര്‍ പട്ടേല്‍, ശിവം ദുബെ, നിതീഷ് കുമാര്‍ റെഡ്ഡി, നമന്‍ ധീര്‍, പ്രിന്‍സ് യാദവ്, മായങ്ക് യാദവ്, അര്‍ഷ്ദീപ് സിംഗ്, ഭുവനേശ്വര്‍ കുമാര്‍, വരുണ്‍ ചക്രവര്‍ത്തി, കുല്‍ദീപ് യാദവ്.

content highlights: 'No Scope for Comparison Between Shreyas Iyer and Suryakumar Yadav': Former Cricketer Abhishek Nayar